Atli Rúnar Halldórsson hefur  stundað upplýsingamiðlun af einhverju tagi allan sinn starfsferil. Hann lauk prófi frá fagskóla í blaðamennsku í Osló og var blaða- og fréttamaður á Alþýðublaðinu, Dagblaðinu og Ríkisútvarpinu frá 1976 til 1995.

 

Hann var einn af eigendum Athygli ehf. og ráðgjafi þar frá 1995 til 2016 og eftir það sjálfstætt starfandi fjölmiðlasýslari, rithöfundur og bókaútgefandi á vegum Svarfdælasýsls forlags sem hann á og rekur ásamt systkinum sínum frá Jarðbrú í Svarfaðardal.

 

Atli Rúnar hefur skrifað bækur um sögu framkvæmda, félaga og fyrirtækja, meðal annars Hvalfjarðarganga, Kárahnjúkavirkjunar, Vinnslustöðvarinnar í Vestmannaeyjum, Fiskidagsins mikla á Dalvík, veitingastaðarins Hornsins í Reykjavík, Sjómannafélags Ólafsfjarðar, verkfræðistofunnar Mannvits (nú COWI).

 

Ennfremur skrifaði hann ævisögu séra Helga Árnasonar, prests í Ólafsvík og Ólafsfirði, og ritstýrði ævisögu Wilhelms Beckmanns, þýsks flóttamanns og myndskurðarmeistara.

​

​Nýjasta bókin, Trélistalíf, fjallar um tréskurðarlist, tréskurðarfólk og myndskera á Íslandi, lífs og liðna. Skrifuð og útgefin 2024.

​

​

​